Dedins, l’edifici a una navada solèta embè pichòtas chapèlas garda un fònt baptesimal gòtic octagonal embè escrichas tiraas dal Credo e da l’Ave e la data 1450, exemplar entre lhi mai recerchats de la botega di esculturs Zabreri de Palhièr en Val Maira.

A l’intrada del cloquièr se tròba una chapèla augivala que garda un cicle de pinturas a fresc dediaas a las istòrias de Jesùs Pichòt, mal tenguas e mal da leser perquè dins lhi sècles passats la vòuta a crosièra es estaa dubèrta per bastir una escala.

Drant del 1961 eron encara visibles de tonds embè busts des Sibilas, iconografia ben rara dins la provincia de Coni, companhaas da escrichas que portavon lo nom e lo vaticini de chasqued’una. Encuèi se pòl encara leser l’Adoracion di Tres Reis: dataa al 1425, per lhi critics l’autor seria lo mesme des pinturas dins la vòuta de la Parroquiala d’Elva en Val Maira. Autre artista, menc rafinat, realiza lo Massacre de lhi Innocents e lo Miracol del gran tirats da lhi Evangelis Apòcrifs.
 

Al temps de l’escapada la Sacra Familha, cerchant de salvar lo Pichòt da Eròd, rescontra un lauraire en chamin a semenar. La Vierge lhi di que seria passat quarqu’un a demandar de lor e lo prega de dir la veritat; après lhi di de prener lo dalh. Lo lauraire, estonat perquè a just finit de semenar, obedìs, e per miracol lo gran creis e es prest per èsser meissonat.

Ai soldats que demandon quora es passaa la familha, lo lauraire respond lo ver: son passats lo jorn qu’a semenaa. Segurs d’èsser tròp en retard, lhi soldats d’Eròd se retiron. Lo cicle se sarra embè la presentacion de Jesùs al temple e la Visitacion.