Glèisa Parroquiala de Sant Joan lo Baptista
Glèisa Parroquiala de Sant Joan lo Baptista
-
Comuna e Valada
CELAS - Val Maira
-
Tròba la glèisa
-
Escòuta l'audio
Un gigantesc cloquièr gòtic
La glèisa resulta jà dins documents del 1386, bèla si entre lo XVII e lo XVIII sècle l’estructura tard-romanica ven esquasi del tot modifiaa en estil Baròc. Fai excepcion lo cloquièr medieval, que garda l’estructura originala embè biforas e auta poncha piramidala e gigantescs blòcs en pèira per fondamenta. Dedins la glèisa presenta una navada solèta embè vòutas a vèla, un grand presbitèri e doas chapèlas, e garda un font baptesimal gòtic de la botiga di fraires Zabreri de Palhièr, ruaa de Sant Dumian.
Lo ver tresòr de la glèisa, eira a Slauces, era un preciós poliptic realizat en lo 1496 dal flamand Hans Clemer: comandaa en lo 1496 da Giovanni Forneris del Piasc, prevòst del temps, l’òbra en cinq taulas es plaçaa sal fons de l’absida.
Retengut entre lhi mai importants de la pintura gòtica piemontèsa, es pintat a tempera d’uòu, sus dui registres. Sus la part sobeirana se tròbon de busts de Sants; sus aquela sotana lhi Sants a figura entièra, sot de pichòts tonds embè una mistaa.
Al centre es plaçaa la Madòna embè lo Pichòt que ten en man un perùç; la vesta de la Vierge es cubèrta d’estèlas: aquela sus l’espatla drecha presenta forma e dimension difèrenta da las autras. Lo morre es ben delicat, e lo juèc de colors e clars es tipic de la pintura flamanda, mas embè lo gaubi delicat d’aquela provençala. L’esfond es a fuelha d’òr cezelat.
A manchina de la Vierge son rapresentats lhi Sants Pèire e Joan lo Baptista, que presènta lo commitent engenolhat, a dimensions mai pichòtas d’aquelas di sants, e a drecha Sant Paul e Sant Joan l’Evangelista. Dins lhi pichòts tonds, a manchina, pareisson Sant Bastian e Sant Michel; al centre tròba espaci l’Anonciacion embè l’Arcangel e la Madòna; a drecha Santa Magdalena e Santa Catarina.
Dins lo registre sobeiran son presentats Sant Lorenç embè la grilha, Sant’Antòni Abat embè un cloquin, simbol de lhi antonians: de fach aqueste òrdre religós s’ocupava de culhir malautes e mòrts de pest e lor passatge era anonciat dal sòn d’un cloquin. A drecha pareis Sant Esteve, lapidat embè de pèiras, e Sant Nicòla da Bari embè las tres mainaas qu’avia resuscitat. Al centre dui angels sostenon un tond ros, qu’a perdut sa cornìs en bòsc, embè lo monograma de Crist IHS. Una escricha dapè l’Anonciacion pòrta l’an d’execucion e lo nom del commitent mas pas aquel de l’autor.