Aquì se retròbon dui cicles d’artistas de periods difèrents, coma dins la granda figura de Sant Cristòfo, gigant que pòrta Jesùs Pichòt, entè la pintura a fresc del tard Quatre Cents es sobrepausaa a n’aquela del Tres Cents.

Autor del cicle mai recent, dediat a de sants, es, coma se pòl leser ai pè de la pintura, lo pintre Tommaso Biasacci de Busca, actiu a La Marmo en lo 1459. Entre lhi sants rapresentats Sant Gregòri, Sant Maxim dedicatari de la glèisa, Sant Francesc que recèu las estigmatas e, a drecha, Sant Gèrom.

Dedins la navada presenta vòutas a crosièra e doas grandas chapèlas lateralas: sus lhi pè de l’arc de manchina son esculturats una bestia, benlèu un lion, e la data 1479; sus la clau de vòuta pareis lo trigrama de Criste.
Dins la chapèla de manchina, dediaa a la Madòna del Rosari, es presenta una pintura a fresc del Cinq Cents del soldat Sant Julian. 
Dins la mesma chapèla es gardat un pichòt autar roman del II sècle, dediat a la Victòria Alaa da Metilius Secundus luèctenent d’August a recòrd d’una victòria di Romans dins lo II sècle d. C..

Lo fònt baptesimal tard romanic remonta al principi del XV sècle; bèla si de mal leser, consideraa la collocacion, sus lhi bòrds son esculturats motius geometrics, fuelhas e figuras umanas coma Adam e Eva, la Madòna embè lo Pichòt e angels, la Crocefission e lhi Evangelistas.

L’autar es en bòsc esculturat e dorat, e la tela, plaçaa aicì en lo 1782, rapresenta Sant Gregòri. La pala del Sufrage rapresenta la Madòna embè lo Pichòt, Sant Jusep, Sant Bernard e lhi espirits del Purgatori: remonta al 1748 e seria òbra de Jusep Domenico Barbetti.