Santuari de Sant Chafred

  •   Comuna e Valada

    CRIÇÒL - Val Pò
  •    Tròba la glèisa

  •   Escòuta l'audio

Una fondacion miracolosa

Lo pus famós santuari d’la Val Pò es dediat a Chafred, soldat roman d’la legion tebea, que se seria estremat sus las Alps per s’escapar da las persecucions contra lhi cristians de l’emperator Massimian. Capturat da l’exercit roman, ven martirizat e maçat ental 290.

Lo 18 de novembre del 522 lhi abitants de Criçòl retròbon per miracol lo còrp soterrat del Sant: una mendia deròcha dal quer ent’un desavers e se salva per entercession del Sant: lhi rests venon retrobats pròpi sal pòst ente era tombaa. En siu onor lhi fidèls fan bastir una glèisa visitaa e restauraa jà dal re longobard Ariperto II ental VIII secle. Lhi premièrs documents a parlar n’en remonton al 1375, quora es nominat coma “Jofredi seu Sinfredi” da l’evesco de Turin: despuèi lo XIV secle comença a èsser frequentat dai pelerins, coma testimonia un document papal del 1387, ente Clemente VII conced las endulgenças ai pelerins visitators d’la chapèla de “S. Zaffredi”.

Sot lo marqués Ludovico II de Saluces l’estructura originaria laissa lo pòst a un grand santuari, retruchat ental 1551, que dins lo 1595 e 1655 es assaltat da vaudés e ugonòts. Ental 1642 las reliquias de Sant Chafred venon meiraas ental Dòm de Saluces, e ental Santuari reston mec lhi òs d’una coissa e una man.

La granda devocion popolara vers aqueste Sant es testimoniaa dai mai de mila quadres votius que despuèi lo Sieis Cents an emplenit la glèisa, tradiccion enca’ viva “per grazia ricevuta”. La façada del santuari ven realizaa vers lo 1915, e es en estil ecleptic que mescla arcs romanics, augivas gòticas e bonhas renaissimentalas. Las estatuas en las nichas gòticas dapè al roson son de Sants Chafred e Sant Joan Baptista, dedicataris del santuari e d’la Parroquiala de Criçòl.

La façada del Cinq Cents se pòl enca’ veire en una fòto al fons d’la navada drecha, dapè a la chapèla des reliquias, e ent’un ex voto pintat e pendut en la mesma navada. L’antica estructura del Cinq Cents se retròba dedins abo la navada centrala da lhi arcs gòtics e vòuta a crotzièra del 1797: las navadas lateralas, parelh coma la chapèla des reliquias, venon jontaas a la fin de l’Uech Cents. Lo Santuari a pas gardat de frescs enteressants, perqué las decoracions son anaas perduas ental cors di diferents restaurs: son presentas nombrosas telas, coma la pala d’autar abo Madòna e Bambin entre lhi Sants Chafred e Francesc, òbra d’un pintre piemontés del XVII secle, e la Madòna, lo Bambin e lhi Sants Chafred e Constanç del XVI secle.
La glèisa garda d’enteressantas esculturas medievalas si chapitèls des colomnas de la premièra e seconda campaa vers l’autar, abo lo simbol di Saluces e lo baston pastoral, benlèu de l’abat Joan, e dui òmes que tenon una planta estilizaa abo lònjas fuelhas. Sot lo pulpit se tròbon lhi fragments de l’inscripcion latina d’la tomba de Sant Chafred.

Sot l’arc trionfal es murat un fragment d’escultura en arenaria ròsa, benlèu rest d’una lastra tombala abo lo simbol di Saluces-Paesana, patròns del Santuari e feudataris d’la valada, abo una corona e una crotz. Dapè a l’aigasantier una lastra exagonala presenta de relièus que pareisson lhi liris de França.

A l'entorn

Chapèla de Sant Bernard

a 6,0 KM da qui 
OSTANA

Ex Coletjaa d’l’Assompta

a 24,7 KM da qui 
REVEL

Chapèla Marquionala

a 25,0 KM da qui 
REVEL

Chapèla de Sant Ponç

a 30,0 KM da qui 
CHASTELAR

Realizzato da    
Con il contributo di    
Iniziativa inserita nell’ambito della Carta Europea del Turismo Sostenibile del Monviso

Textes italians | traducions en occitan | votz italian e occitan: Rosella Pellerino
Traducions en anglés: Karen Kloss   Fotografias: Paolo Viglione

Questo sito utilizza cookies per offrirti un'esperienza di navigazione migliore. Continuando la navigazione nel sito autorizzi l’uso dei cookies. Maggiori informazioni.