Chapèla Marquionala

  •   Comuna e Valada

    REVEL - Val Pò
  •    Tròba la glèisa

  •   Escòuta l'audio

Ental palais d’la Marquesa

La Chapèla marquionala fasia part del palais ente Marguerita de Foix, vedoa del Marqués Ludovico II de Saluces, passava l’istaa après èsser-se meiraa a Revèl entre 1504 e 1532; après la destruccion de l’ala est, encuei l’edifici es devengut Municipi.

La chapèla presenta planta rectangolara que finìs ent’una absida semicircolara; l’estil es tardogòtic, abo doas campaas d’arcs e vòuta a crotzièra; l’absida es dividua en cinq leschas, abo doas fenestras augivalas.

La decoracion frescaa comença da 2,50 m d’autessa, perquè dessot se trobava lo còro en bòsc encuei en Casa Cavassa a Saluces.

Lo cicle de pinturas es rar perqué dediat a l’istòria di Marqués: en l’absida se tròbon lhi retrachs de la familha marquinala: da manchina lhi filhs de Ludovico II Michele Antonio, Francesco, Adriano, presentats dai Sants Michel, Antòni, Francesc, Adrian. Lo retrach de Ludovico II es presentat da Sant Loìs de França, e aquell de la Marquesa Marguerita de Foix da Santa Marguerita d’Antiòquia. Completon la familha lhi filhs Giovanni, Ludovico e Gabriele presentats dai Sants Joan Baptista, Ludovico da Tolosa e Gabriel arcangel. La luneta centrala era dedicaa a una gigantesca Vierge, e dessot se tròbon d’inscripcions onorarias.

S’las muralhas son contaas doas agiografias, las Istòrias di Sants protectors de la cobla marquionala, Santa Marguerita d’Antiòquia e Sant Loìs de França.

L’òbra ven realizaa entre 1515 e 1519. Sot las lunetas dedias a Marguerita e ai filhs Giovanni, Ludovico e Gabriele, pareis un estrop de Santas: Clara, Scolastica, Catalina, Òrsola, e Sant’Ana abo la Vierge e lo Bambin, que navison la man d’Hans Clemer.

En las lunetas sobre las agiografias se tròbon lhi Evangelistas e Doctors de la Glèisa, presentats en biblioteca a escriure lors òbras: a drecha Geròmo, Gregòri, Matè e Joan, a manchina Ambròs, Agostin, Marc e Luc. 
Las Istòrias de Sant Loìs presenton sieis moments: lo jove Dalfin de França sot la protecion d’la maire Bianca de Castiglia; Loìs apren da la maire las reglas del bòn govern; Loìs part abo l’exercit francés da las Aigas-Mòrtas per la crosada ental 1248; Loìs a l’enterrament d’la maire; las òbras de misericordia de Loìs; Loìs muèr a Cartagine.

Decò las Istòrias de Santa Marguerita presenton sieis moments, de mal leser per las infiltracions d’aiga: Marguerita pastura las feas de la noriça e lo prefech Olibio s’enamora; la mendia es processaa perquè a pas vorgut far sacrificis a lhi dius de Roma; la tortura d’la Santa, liaa a un cavalet e frustaa; Marguerita en preson es tentaa dal diaul e ve lo Malinh sot forma de drag, puèi en pregant lo chaça (bèla se la legenda di que sie estaa minjaa dal drag, e se sie liberaa escarsant-lhi lo ventre; pr’aquò era invocaa da las fremas en condicions per facilitar l’acochament); la decapitacion d’la Santa; la mòrt.

Marguerita deven una santa talament invocaa ental Medioevo e Renaissiment, que deven una di 14 Sants ausiliators. Lhi dui arcs son decorats abo figuras di Sants Antòni abat, Ròc, Bastian (lo quart es anat perdut) e des Santas Apollònia, Agata, Catalina e Lucia. Lhi chapitèls e la mensola abo telamon a forma d’angel polerion èsser òbra a caval del Quatre e Cinq Cents de l’escultor lombard Matteo Sanmicheli; en la premièra campaa pareisson lhi simbols d’la fenìs, animal simbol car ai Marqués, e lo mòt “Mancant viu”. Drant del 1525 un pintre anònim fresca sus la contra façada una Ultima cena en estil leonardesc.

A l'entorn

Ex Coletjaa d’l’Assompta

a 0,3 KM da qui 
REVEL

Chapèla de Sant Ponç

a 7,5 KM da qui 
CHASTELAR

Abadia de Santa Maria (Staffarda)

a 9,3 KM da qui 
REVEL

Abadia di SS. Pèire e Colomban

a 12,6 KM da qui 
PANH

Realizzato da    
Con il contributo di    
Iniziativa inserita nell’ambito della Carta Europea del Turismo Sostenibile del Monviso

Textes italians | traducions en occitan | votz italian e occitan: Rosella Pellerino
Traducions en anglés: Karen Kloss   Fotografias: Paolo Viglione

Questo sito utilizza cookies per offrirti un'esperienza di navigazione migliore. Continuando la navigazione nel sito autorizzi l’uso dei cookies. Maggiori informazioni.