Chapèla de Sant Bernard
Chapèla de Sant Bernard
-
Comuna e Valada
OSTANA - Val Pò
-
Tròba la glèisa
-
Escòuta l'audio
Ai pè del Viso
Plaçaa en la ruaa que pòrta lo mesme nom a 1340 metres d’autessa, la Chapèla de Sant Bernard era jà presenta ental Catedratic de Turin del 1386 sot lo titol de “S. Nicolaus d’Augustana” dependenta da la Pieve enferior de Barge. Encuei la glèisa a englobat las estructuras medievalas; de fòra es en pèira, fòra que la façada decoraa ental Nòu Cents, abo cloquier a vela sobre lo portal principal, datat 1778.
Lo cubèrt es en lausas, presentas decò sal pòrtic en bòsc sal portal lateral.
La glèisa presenta tres ambients cubèrts da vòuta a botala, abo decoracions del 1899; en l’absida son estats retrobats de frescs de la fin del XV secle, enchaucinats al temp des guerras de religion entre calvinistas e catòlics, quora era costuma arroinas lhi morres di Sants. Lhi mai enteressants son l’Anonciacion e Sant Chafred, patròn d’la Val Pò, qu’arsòna l’estil de Pèire da Saluces.
A drecha d’la navada, ent’una nicha, se tròba un fresc abo la Madòna e lo Bambin entre Sant Ròc e Sant Bastian, d’la fin del Sieis Cents. Benlèu l’òbra ven realizaa per ganhar l’entercession di dui Sants, protectors da la pest, en ocasion d’la famosa epidemia chantaa dal Manzoni e arribaa decò en las valadas.
Encuei en la chapèla lhi a pus degun referiment al Sant dedicatari, mas fins al 1986 la glèisa gardava dui palas d’autar, encuei en la Parroquiala de Sant Guiaude: una abo la Madòna, lo Bambin e Sant Bernard del 1694 e una pus recenta abo Madòna, Bambin e lhi Sants Ròc e Bastian.